ماذا بعد أن تنجح بامتحان الكولكيوم؟
بعد ما تنجح بالامتحان, في عندك يعني تقريباً شي شهر - شهر ونص ما فيك تساوي فيهون شي, ليش ؟
لإنو ما بيطلع قرار التخرج لحتى يخلصو كل الاختصاصات. يمكن يتغير هاد الشي , بس بالدورة اللي تخرجت فيها طلع قرار التخرج بعد 50 يوم تقريباً.
بس يطلع , ما في شي صعب أبداً .
بتروح على مديرية الصحة اللي تابع لإلها و بتاخد وراقك لمجمع التأهيل و التدريب اللي جنب المجتهد.
هنيك بتسجل درجة التقييم ( مقبول - جيد - جيد جـ... ), و بتروح لوزارة الصحة بتسلمون الوراق و بتروح و بترجع بعد يومين بتكون الشهادة جاهزة.
تأكد من إنو توقيع الوزير موجود ....
بعدين بتشتغل بإجراءات الترخيص . طبعاً إذا كنت سوري الجنسية , بتدفع عشرة آلاف ليرة سورية و بتاخد ترخيص دائم.
إما إذا كنت مو سوري و حابب ترخص بالبلد , هون أنا ما رح كفي , لإنو يمكن احكي و احكي و بعدين ............
الانفكاك:
بشكل روتيني , بينفك العقد بعد ما يمضى 15 يوم من انتهاء فترة العقد , يعني من أول السنة الجديدة (لإنو عقد وزارة الصحة بيستمر لآخر السنة).
هون لازم تساوي كزا شغلة :
براءة الذمة : و هي ياسيدي شغلة خطيرة كتير , هيه عبارة عن ورقة فيها 12 كلها بدها تواقيع. طبعاً هاد الشي بيتضمن المستودعات على أنواعها , المكتبة , المدير الإداري .. لفة طويلة , إذا كانت الأمور ميسرة بتاخد معك شي ساعتين فتلة . بيجوز المشكلة مو بالتوقيع المشكلة إنك تلاقي وين لازم تروح , و تلاقي صاحب التوقيع لحتى يطج توقيعو...
هون و بس تخلص التواقيع , (بما فيها توقيع مدير / نائب المدير), بتروح على الذاتية , منشان يكتب طلب الانفكاك, بيتوقع هاد كمان من نائب المدير , و بتروح على الديوان منشان يتسجل هنيك .
بالنهاية لازم تحتفظ بنسخة من (براءة الذمة و الانفكاك)
هون المشوار لازم يكون لمديرية الصحة. بسسسسسسسسسسس نصيحة مني قبل ما تروح, ساوي هالكم ورقة:
بيان خدمة لكامل المدة (هاد إلك , بتستفاد منو بعدين).
بيان بالإجازات المرضية و البلا أجر.
بيان بآخر راتب قبضتو من المشفى , هاد من عند المحاسب.
آخر ورقتين هنن منشان التأمينات الاجتماعية.
بمديرية الصحة , بتروح على ديوان المديرية , بتسجل طلب الانفكاك, و بتساوي شو بيقولولك هنيك ..
طبعاً في فتلة منشان التأمينات الاجتماعية....
في أوراق يمكن تفيدك بالمستقبل , لازم تحصل عليها من التأهيل و التدريب (البناء اللي جنب المجتهد).
ورقة تعادل شهادة الاختصاص بوزارة الصحة مع شهادة الدراسات العليا ( الماجستير ), بيوقع عليها مدير الامتحانات و نائب وزير الصحة.
على فكرة في ملاحظة , أنا لما ساويت الورقة , طلبت إنو ما تنذكر كلمة (ماجستير) , علماً إنو طلاب الدراسات العليا لما بياخدو شهادتون ما في عليها كلمة ماجستير......
هون بتاخد الورقة عالخارجية فوق بآخر الجبل , بتصدق الورقة و بتحتفظ فيها لوقت العازة.
الورقة التانية اللي لازم تساويها , هيه ورقة النجاح و المعدل , بينحط فيها معدلك .... يعني ممكن تفيد.
طبعاً لازم تساوي صور مصدقة عن شهادة الاختصاص (على القليل عشرة) معليش يمكن تعتازون, أحسن ما تنكرف بهالمشوار بعدين.
8-1-2009